आरेचं जंगल

आरेचं जंगल
विकासाच्या नावाखाली
संकटात आरेचं जंगल
फुफ्फुसावर कुर्‍हाड घालून
होईल का आपलं मंगल?
• रघुनाथ सोनटक्के

हवामानबदल

खरपूस • वात्रटिका

हवामानबदल
हिवाळ्यात पडतो पाऊस
थंडी, धुके आणि बादल
ऋतुंची ही सरमिसळ
कि आहे हवामानबदल?

झाडांची बेसुमार कत्तल
रसायनांचा अनाठायी वापर
जीवसृष्टी आली धोक्यात
दिसू लागला त्याचा असर

स्वार्थापायी आज माणुस
निसर्गाला भुलला आहे
जे पेरलं त्याच्याच पिकाने
मळा आता फुलला आहे
   • रघुनाथ सोनटक्के

 

पराभवाचा धक्का

पराभवाचा धक्का

अंहकार वाढला कि
मिळतो पराभवाचा धक्का
आपोआपच खालावतो मग
लोकप्रियतेचा टक्का

जनतेच्या आकांक्षावर
द्यावा लागतो सदा भर
पायऊतार व्हावे लागते
नाही काम केले तर

केला जरी प्रचार नेटाने
लाऊन धरत नको तो मुद्दा
ओळखून आहे मतदार
कोण खरा अन् खोटा सुध्दा
• रघुनाथ सोनटक्के

विस्तार

विस्तार
वाटाघाटी बस्स झाल्या
विस्तार आता हवा आहे
सत्तेची वाटणी खरं तर
नव्या मित्रांची दवा आहे

किती दिवस चालवणार
चर्चेचं नुसतं गुर्‍हाळ
खाऊन झालाय ना आता
पहिल्या अधिवेशनाचा फराळ
• रघुनाथ सोनटक्के

आखाडा

आखाडा
संसद आणि विधिमंडळाचा
झाला आहे आखाडा
समाधान शोधायला बसले कि
करायला नवा बखेडा

पोरांची शाळा तरी शांत
यांचा असतो त्याहून दंगा
प्रश्न, विधायक चर्चा व्हावी
कि घ्यावा ऐकमेकांशी पंगा

जनतेच्या प्रश्नासाठी
भरवले पाहिजे दालन
कायदा जिथे बनतो तिथे तरी
किमान हवे शिस्तचे पालन
• रघुनाथ सोनटक्के

कायदा

कायदा
मातीतल्या माणसांना
मिळेना हवा तसा फायदा
कशाला हवाय लोकांना
असा कोणता कायदा?

बेरोजगारी, महागाईवर
टाकत आहात का झाकण
परक्यांचा कशाला ठेका
कोण करेल त्यांचं राखण?
• रघुनाथ सोनटक्के

बंड

बंड

पक्षासाठी झटलेला नेता

पूर्वीपासूनच झटत असतो

अन्याय झाला कि मग

बंड करून पेटत असतो

त्या एका नाथाची

थोडीच राहिली प्रीती आहे    

पंकजाच्या जाण्याचीही

अंतर्गत भीती आहे  

 

आता गेला 'एक'नाथ

संपली होती त्याची प्रीती

पाकळ्या गळून जाण्याची

सतावे कमळाला भीती

• रघुनाथ सोनटक्के

कळलाव्या

कळलाव्या

सारे पक्ष फिरून झाला

भाव नाही चाराणे

कधीच सरकं बोलत नाही

सदानकदा गार्‍हाणे

आहेत आमच्या संपर्कात

नाकाने भेल्या फोडत असतो

कळलाव्या लावायला कुणी

तारेच नुसते तोडत असतो

• रघुनाथ सोनटक्के

दाव्यांना प्रतिक्षा

दाव्यांना प्रतिक्षा

आजही प्रतिक्षेत आहेत

लाखो बलात्काराचे दावे

कधी मिळेल न्याय त्यांना

अन् कधी निराकरण व्हावे

एकविसाव्या शतकात

महाशक्तीची पाहत आहोत स्वप्ने

आकडेवारी फुगली कि

वाढले आहेत उगीच हे गुन्हे

बर्‍याचवेळा दिली जाते

याला जाती-धर्माची झालर

राजकारणीही करत आहेत

त्याचा हवा तसा वापर

• रघुनाथ सोनटक्के

न्यायाची दिरंगाई

न्यायाची दिरंगाई
मोर्चे, मेणबत्त्या पेटवणे
व्यर्थ चर्चांचा खल
दिरंगाईच वाढवत आहे
गुन्हेगाराचे मनोबल

कायदा आणि न्यायालय
पडत आहे पांगळे आणि लुळे
कित्येक निष्पापांचे जीव
जात आहेत खरेतर याचमुळे

वर्षानुवर्षे गुन्हेगार मोकाट
म्हणजेच मिळत राहते माफी
धाक आणि जरब बसावी
मग धजावणार नाही पापी
• रघुनाथ सोनटक्के

कांदा

कांदा

पिकवला जरी कष्टाने

मातीमोल होऊन रडवतो

अधूनमधून सामान्याला

भलताच म्हणे अडवतो

नेहमीसाठी तर कांद्याचा

भाव नुसता पडत असतो

क्वचित वाढला कि

शहरी माणूस रडत असतो

• रघुनाथ सोनटक्के

दंडवसूली

  • दंडवसूली •

दामदुप्पटीने वाढले आहेत
वाहतूकनियमांचे चलन
बिमारीपेक्षा उपायानेच
होतेय चालकांची जलन

आशा करूया बेशिस्तीचे
कमी होऊ दे बळी
लाचखोरीच्या कुरणावर
कुणी भाजू नये पोळी
• रघुनाथ सोनटक्के

खैरात

आश्वासनांची खैरात
ज्यांची त्यांची चालली आहे
वाटणे आश्वासनांची खैरात
निवडणूकीचा हा मोसम
आला आहे खुपच भरात

आवाक्याबाहेर वादे करून
जनतेला फक्त भूरळ असते
समजदार जनतेचं मत मात्र
थेट आणि सरळ असते
रघुनाथ सोनटक्के

प्रचार भ्रमन

प्रचार भ्रमन

कुणी मागतो हिशेब
कुणी करतो दावा नवा
नको तेवढा जोर यांचा
अन् मतदाराकडे धावा

फक्त आम्हालाच निवडा
एवढेच त्याचे टूमणे आहे
एका ठिकाणाहून दुसरीकडे
भीक मागत घुमणे आहे
• रघुनाथ सोनटक्के

राजकिय कुस्ती

राजकिय कुस्ती

कुस्त्यांचा रंगलाय फड
पहेलवानांची झाली तालिम
कुणी करतो बोलबच्चन
तर कुणाची टिका जालिम

टिका, शेरेबाजी आणि आरोप
सभा सारेच गाजवत आहेत
आपणच कसे चांगले त्यांपेक्षा
ढोल स्वत:चा वाजवत आहेत
• रघुनाथ सोनटक्के

औटघटकेचा संसार

औटघटकेचा संसार

दाखवुन मोठा हिसका

दादा झाले फरार

फाईल साफ करण्यापुरता

होता त्यांचा करार

सत्तेच्या लालसेने 

फसली कमळाबाई

पहाटे-पहाटेच होती

तिला लग्नाची घाई

उभ्या महाराष्ट्राला दाखवुन 

काका-पुतण्याचा वाद

अवघ्या तासातच केला

संसार त्यांचा बाद

• रघुनाथ सोनटक्के

अतरंगी सर्कस

अतरंगी सर्कस

कधी होतो एक वरचढ

आणि दुसरा लगेच खाली

महाराष्ट्राच्या राजकारणाची

अतरंगी ही सर्कस झाली

क्षणात पलटते बाजी

कुणी टाकतो फासा

रात्रीत खेळ चालल्यावर

दिवसा होणारच हसा!

पैसा आणि सत्तेचा

असतो काहींना माज

कायद्याच्या रेट्याने मग

उतरवली जाते खाज

कोण खरा चाणक्य

कुणाची कुटील निती

खर्‍याला वाटते नसते

कितीही संकटाची भीती

• रघुनाथ सोनटक्के

सत्तेसाठी आटापिटा

सत्तेसाठी आटापिटा
प्रत्येकाचा सत्तेसाठी आटापिटा
आणि खोटाखोटा जुमला आहे
धावपळ पाहून राजकारण्यांची
अख्खा महाराष्ट्र दमला आहे

ऐकमेकांची तंगडी खेचण्यात
सारेच आता दंग आहेत
रोज बघावेत तमाशे यांचे
किती वेगवेगळे रंग आहेत

धड कुणाचंच जुळेना
शेतकर्‍याचा नाही कुणी वाली
यांनी मात्र पांघरल्या आहेत
चर्चा, वाद आणि बैठकांच्या झुली
• रघुनाथ सोनटक्के

चर्चा बैठका

चर्चा बैठका

सरकारला मुहुर्त मिळेना

शेतकर्‍याचा नाही वाली

यांनी मात्र पांघरल्यात

चर्चा, बैठकांच्या झुली

रघुनाथ सोनटक्के

सत्तेची वाटणी

• सत्तेची वाटणी •

वैचारिक वादांची
चालू आहे छाटणी
समन्वयाने हवी आहे
त्यांना समान वाटणी

विकास आणि समन्वयाने
भरू द्या कारभाराचे तळे
जनतेसाठीच एकत्र बसा
नंतर मग काढू नका गळे
• रघुनाथ सोनटक्के

सत्ताकारण

सत्ताकारण

एकदाचं जुळलं बघा

सत्तेचं अनोखं समिकरण

कलाटणी देऊन बदललं

महाराष्ट्राचं हे राजकारण

अहंकार आणि लबाडीचं

दर्शन झालं अाहे मोठं

दोस्तीच्या आडं झाकलेलं

उघडं पडलं खोटं

शेवटी प्रत्येकासाठी 

सत्ता हेच कारण आहे

सत्ताधार्‍यांचाच विजय

सामान्याचं मरण आहे

• रघुनाथ सोनटक्के

दावा आणि हेका

दावा आणि  हेका

इकडून आणि तिकडूनही

आहे सत्तास्थापनेचा दावा

मुख्यमंत्री मात्र आपलाच

दोघांना काही करून हवा

घड्याळ करते टिकटिक

पुढे यायला कचरतो हात

पत्रपरिषदेने फटाक्यांना

रोजच लावली जाते वात

• रघुनाथ सोनटक्के

तिढा

तिढा

मतदान करून झालं

आता सत्तेचा तिढा आहे

वाली नसलेल्या जनतेला

आणखी एक पिडा आहे

वाटणीपायी भांडण 

समजुतदारपणा थोडा आहे

दोस्तीदोस्तीतच लावला

ऐकमेकांना घोडा आहे

• रघुनाथ सोनटक्के

महापेच

• महापेच •

चालू आहे सध्या
सत्तेची रस्सीखेच
स्पष्ट असलं तरी
पडलाय 'महा'पेच

एक एकीकडे तर
दुसरा दुसरीकडे खेचतो आहे
लग्न झालं सुखाने
मात्र हनिमून टोचतो आहे
• रघुनाथ सोनटक्के

सत्तेचं लोणी

• सत्तेचं लोणी •
भांडायला लागले आहेत
चाखण्या सत्तेचं लोणी
विसर पडला जनतेचा
ऐकायला तयार नाही कुणी

आकड्यांच्या बळावर
चालू आहे सत्तेचा खेळ
असाच वाया घालवतील
नको तेवढा वेळ

पाठिंबा, सत्तेचा वाटा
चालत राहिल काही दिवस खेळ
जनमत गेलं खड्ड्यात
हा तर लोभ, अहंकाराचा मेळ
• रघुनाथ सोनटक्के

भिजत घोंगडं

  भिजत घोंगडं
युतीचं पडलं भिजत घोंगडं
राणे वाटेवर थांबले आहेत
आज-उद्या घोषणा म्हणता
त्यांचेही प्रवेश लांबले आहेत

त्यांची बार्गेनिंग चालू आहे
काही काठावर आहेत
सत्तेचं पाणी प्यायला
पक्षप्रवेशाच्या पथावर आहे
• रघुनाथ सोनटक्के

 

सत्तेची उब

खरपूस • वात्रटिका

सत्तेची उब
सोडून गेले बरेच नेते
राहिले फक्त मावळे
फांदी बदलून बसलेत
काळे ते कावळे

आज इथे, तर उद्या तिथे
घर त्यांचं फिरत आहे
त्यांच्या सत्तेच्या उबेपायी
कार्यकर्ताच मरत आहे
• रघुनाथ सोनटक्के

लाडीगोडी

आधी फोडाफोडी झाली
आता जागांची सोडासोडी आहे
आधी काढले उणीदुणी
आता सत्येसाठी लाडीगोडी आहे

भावाचा बळी

भावाचा बळी

अल्पमतात चालवलं सरकार
मित्रालाच कोपरखळी आहे
महत्वाकांक्षा आणि स्वबळाने
भावाचाच जातोय बळी आहे

जुळलं असं वाटलं तरी
आतून लपवली सुरी आहे
एकदा थेट शत्रू परवडला
हि गोष्ट तेवढीच खरी आहे
• रघुनाथ सोनटक्के

चांद्रयान २

खरपूस • वात्रटिका

  • चांद्रयान २ •

भारताचे चांद्रयान मोहिमने
एक पाऊल पुढे पडते आहे
जे केले आहे प्रयत्नपूर्वक
ते चांगलेच घडते आहे

यश मिळेलच प्रत्येकवेळी
याची नेहमी हमी नसते
आशाआकांक्षा जागृत असल्या कि
प्रयोगांचीही कमी नसते

आधीच मंगळमोहिमेने
इतिहास आपण रचला आहे
थोड्याशा अपयशाने कुठे
भारतीय हा खचला आहे?
• रघुनाथ सोनटक्के

मंदीच्या झळा

  • मंदीच्या झळा •

बसत अाहेत मंदीच्या
जरी दाहकतेने झळा
तोंड दाबून सोसाव्यात
महागाईच्या कळा

सेंसेक्स कोसळला
रूपयाही घसरला आहे
मंदीची आली लाट
विकासही ओसरला आहे
• रघुनाथ सोनटक्के


(दै. युवा छत्रपती, वात्रटिका क्रं. २७७)
शब्दरसिकचा दिवाळी अंक येथे बघा:
http://bit.ly/ShabdRasik-2019

रानूचा गळा

खरपूस • वात्रटिका

  • रानूचा गळा•

यशाची पायरी चढली
मंडलची ती रानू
पोहचू शकले नाहीत जीथे
भले गळा तानू तानू

कंगाल असलो कि आप्तही
कायम ठेवतात दुरी
पैसा, प्रसिद्धीसाठी मात्र
गळ्यात पडतात पोरी
• रघुनाथ सोनटक्के

(दै. युवा छत्रपती, वात्रटिका क्रं. २७६)

मनाचे राजे

खरपूस • वात्रटिका

     • मनाचे राजे •
कुणी कुठे वाटेवर आहे
कुणी लागला आहे गळाला
काल म्हणत होता एकनिष्ठ
आज कसा काय हो पळाला!

सत्तेकडे धाव सगळ्यांची
कुणी आपल्या मनाचे राजे
कुणी घेते बांधून बंधन
कमळ होतेय आणखी ताजे
• रघुनाथ सोनटक्के

(दै. युवा छत्रपती, वात्रटिका क्रं. २७४)

स्वाभिमान

खरपूस • वात्रटिका
 
स्वाभिमान

टिकून-टिकून किती दिवस
स्वाभिमान टिकणार आहे
पोराबाळांसकट तो आता
म्हणे पक्षही विकणार आहे

सत्ताप्राप्ती हेच ध्येय
आणि तेच धोरण असते
कार्यकर्त्यांची इच्छा सांगणे
फक्त तेवढंच कारण असते

• रघुनाथ सोनटक्के

(३१ ऑगस्ट २०१९, दै. युवा छत्रपती, वात्रटिका क्रं. २७१)

सोशलमिडीया

खरपूस • वात्रटिका
 
सोशलमिडिया

सोशलमेडियाच्या झोताने
येतात लोक उजेडात
कुणी होतो बदनाम तर
कुणी स्टार रातोरात

जाहिरातीच्या या जगतात
प्रसिद्धी रोज हवी असते
रोज घडणारी गोष्टही
कधी खुप नवी असते

दुधारी हे शस्त्र आहे
वापरणार्‍यावर ठरतं
कधी उगीच त्रासदायक
तर कधी असरदार ठरतं

• रघुनाथ सोनटक्के

(२८ ऑगस्ट २०१९, दै. युवा छत्रपती, वात्रटिका क्रं. २७०)

मानबिंदू

खरपूस • वात्रटिका

मानबिंदू

बॅडमिंटचं अजिंक्य
जिंकली आहे सिंधू
स्थापित केला भारताने
तिथंही मानबिंदू

• रघुनाथ सोनटक्के

(२९ऑगस्ट २०१९, दै. युवा छत्रपती, वात्रटिका क्रं. २६९)

आवकजावक

खरपूस • वात्रटिका

   • आवकजावक •

पक्षापक्षात आवकजावक
खुप मोठी वाढली आहे
प्रलोभनांच्या चुंबकाने
जुनी धेंडही ओढली आहे

पहिल्यासारखा पक्षनेतृत्वाचा
धाक उरला नाही
जनतेला बांधील असणारा
खाक उरला नाही

• रघुनाथ सोनटक्के

(२८ ऑगस्ट २०१९, दै. युवा छत्रपती, वात्रटिका क्रं. २६८)

 

मंदीचा फटका

खरपूस • वात्रटिका

• मंदीचा फटका •
सर्वसामान्यालाच बसतो आहे
मंदीचा दाहक फटका
उद्योग-व्यवसाय मोजताहेत
काही शेवटच्या घटका

कंपन्याही करताहेत
नोकरांची मोठी कपात
भरडल्या जातो सामान्य
काही आहेत सुपात
• रघुनाथ सोनटक्के

शब्दरसिकचा दिवाळी अंक येथे बघा:http://bit.ly/ShabdRasik-2018

(२६ ऑगस्ट २०१९, दै. युवा छत्रपती, वात्रटिका क्रं. २६७)

 

भ्रष्टाचारी नेता

खरपूस • वात्रटिका

• भ्रष्टाचारी नेता •
पदाचा फायदा घेऊन
करे भ्रष्टाचाराचा खेळ
कधीतरी येतेच मग
आतमधे जायची वेळ

भ्रष्टाचारी सापांचा अशा
पडतो आहे देशाला विळखा
समर्थन करणार्‍या पक्षांना
येतो तरी किती मोठा पुळका!
• रघुनाथ सोनटक्के

(२३ ऑगस्ट २०१९, दै. युवा छत्रपती, वात्रटिका क्रं. २६५)

जत्रा

खरपूस • वात्रटिका

« जत्रा »

कुणाला हवा आशिर्वाद

कुणाची वेगळीच जत्रा

अशा मतलबी राजकारणाचा

जास्तच आहे खतरा

• रघुनाथ सोनटक्के

(दै. युवा छत्रपती, वात्रटिका क्रं. १६४)

विरोधकांचं दमन

खरपूस • वात्रटिका

  • विरोधकांचं दमन •
राजकारण रंगत चाललं
कुणामागे लागली ईडी आहे
संस्थाचा गैरवापर करण्याची
सवय काय आजची थोडी आहे!

सत्ताधार्‍याकंडून हरतर्‍हेने
विरोधकांचं दमन असते
सत्तेला शहाणपण सांगणे म्हणजे
पालथ्या घड्याला नमन असते
• रघुनाथ सोनटक्के

(२१ ऑगस्ट २०१९ दै. युवा छत्रपती, वात्रटिका क्रं. २६३)
 

पुराचा वेढा

खरपूस • वात्रटिका

« पुराचा वेढा »

पुरानं वेढलं आहे

कोल्हापूर आणि सांगली

मदतकार्यात प्रशासन थीटं

अब्रु वेशीवरच टांगली

खायला हवं अन्न-पाणी

पोहचायला हव्यात बोटी

समाजसेवी गेले धाऊन

यंत्रना पडत आहे थीटी

• रघुनाथ सोनटक्के

(दै. युवा छत्रपती, वात्रटिका क्रं. २५८)

शब्दरसिकचा दिवाळी अंक येथे बघा:http://bit.ly/ShabdRasik-2018

पुराची विपदा

पुराची विपदा

जिथेजिथे बिकटस्थिती
साचलेले पाणी आणि पूर
संकटात धावून लगेच
करा लोकांची विपदा दूर

कठिण प्रसंगी अशा
मदतीला धावले पाहिजे
एकमेका सहाय्य करण्या
दोन हात लावले पाहिजे

पूर, भूकंप आदी विपदा
म्हणजे कठीण घटका असते
माणुसकी दाखवली तरच
संकटातून सुटका असते

• रघुनाथ सोनटक्के

ब्लाॅग : https://vatratika.blogspot.in

 (८ ऑगस्ट २०१९ दै. युवा छत्रपती, वात्रटिका क्रं. २५६) 

 

पक्षबदलाचे वारे

खरपूस • वात्रटिका

« पक्षबदलाचे वारे »
 जिकडेतिकडे वाहतायत
पक्षबदलाचे वारे
ऐन मोसम पाहून फिरले
जूने, जाणते सारे

कुठे भगदाड पडले
घराचेही फिरले वासे
धाकाने तर कुठे लोभाने
गळाला लागले मासे

विरोधी पक्ष सगळे
पडले आहेत खाटेवर
सत्तेच्या मोहापायी
मोहरे निघाले वाटेवर
• रघुनाथ सोनटक्के 
शब्दरसिकचा दिवाळी अंक येथे बघा: http://bit.ly/ShabdRasik-2018 

(३१ जुलै २०१९ दै. युवा छत्रपती, वात्रटिका क्रं. २५०)

खड्डे

« खड्डे »

रस्त्यांची खड्डयांना

अन् खड्डयांची रस्त्यांन‍ा
गरज भासु लागली
माणसं चालली जीवानं
करांचा जनता भार सोसु लागली

नेमीची येतो पावसाळा

अविरत फिरणारं खड्डयांचं 'जातं'
पालिकेला काही फरक नाही
म‍ाध्यमांनी चालवलं जरी अविरत भातं

करोडो रुपये खर्चुन शेवटी काय ?

हाती पडतो मातीचा चुरा

खड्डयांनाही घ्यावा लागतो पुर्नजन्म

त्यांनाही चुकला ना फेरा

• रघुनाथ सोनटक्के

ब्लाॅग : https://vatratika.blogspot.in

 (३० जूलै २०१९ दै. युवा छत्रपती, वात्रटिका क्रं. २४९) 

जागावाटप आणि बळ

खरपूस • वात्रटिका

 
« जागावाटप आणि बळ »

जागावाटपाने सगळ्यांचा
जोरात चालला खल आहे
निकालानंतर कळेलच
कुणाचं किती बल आहे

आता तर प्रत्येकातच
दहा हत्तीचं बाहू बळ आहे
शेवटी कोणाची, कधी दाबावी
'त्याच्या'च हाती कळ आहे

• रघुनाथ सोनटक्के

(२९ जूलै २०१९ दै. युवा छत्रपती, वात्रटिका क्रं. २४८)

भिती आणि लालसा

« भिती आणि लालसा »

काहींना आहे पराभवाची 

भिती आणि लालसा

त्यांच्यामुळे पक्षांचे गड

होतात हळूहळू खालसा

• रघुनाथ सोनटक्के

 २७ जूलै २०१९ दै. युवा छत्रपती, वात्रटिका क्रं. २४७

 

पावसाची प्रतिक्षा

खरपूस • वात्रटिका

« पावसाची प्रतिक्षा »

पावसा तू तर भरपूर
पुण्या-मुंबईत पडला
विकासासारखाच इथंही
अन्याय आम्हावर घडला

थोडासा शिरकावा पडला होता
रोप आता करपली आहेत
तुझ्या येण्याची वाट पाहत
लेकरं तुझी तरसली आहेत

माना टाकल्यात पिकांनी
पानं आता आवरली आहेत
आत्महत्येच्या विचाराने आता कुठं
पोरं तुझी सावरली आहेत
• रघुनाथ सोनटक्के

(२६ जुलै २०१९ दै. युवा छत्रपती, वात्रटिका क्रं. २४६)

हिमा दासचे यश

खरपूस • वात्रटिका

 

हिमा दासचे यश

पाच गोल्ड जिंकले
एकट्या दास हिमाने
उंचावली देशाची मान
मोठ्या अभिमानाने

शेतकऱ्याच्या पोरीने
देशाचे नाव कोरले आहे
तिचे यश देशालाही
अद्वितीय ठरले आहे

एकाच खेळामागे न जाता
बहूआयामी धोरण आखले पाहिजे
भंपकपणा होणार नाही याचे
माध्यमांनी भान राखले पाहिजे

• रघुनाथ सोनटक्के

(२५ जुलै २०१९ दै. युवा छत्रपती, वात्रटिका क्रं. २४५)  

चंद्रावर पाऊल

खरपूस • वात्रटिका
 
« चंद्रावर पाऊल »

चांद्रयान एकदाचं
आकाशात पोचलं आहे
मानाचं पान आणखी
भारताने खोचलं आहे

विज्ञान आणि चिकाटी
त्याचंच हे फलित आहे
सक्षमीकरणाचं पाऊल
आणि क्षमता मुलींत आहे

स्वदेशीच्या आधारे आपली
चंद्रावर ही स्वारी आहे
खऱ्या अर्थाने आता
आपण जगात भारी आहे

• रघुनाथ सोनटक्के

(२४ जुलै २०१९ दै. युवा छत्रपती, वात्रटिका क्रं. २४४)

दावेदार

खरपूस • वात्रटिका

 
« दावेदार »

निकाला आधीच दोघे
पदावर दावा मांडायला लागले
नैसर्गिक मित्र असूनही
दुश्मनासारखे भांडायला लागले

एकत्र लढायला तयार
कारण मित्र हवा असतो
पदाच्या खुर्चीवरही मात्र
जोरदार त्यांचा दावा असतो

• रघुनाथ सोनटक्के

(२३ जूलै २०१९ दै. युवा छत्रपती, वात्रटिका क्रं. २४३)

इधरभी उधरभी

खरपूस • वात्रटिका

« इधरभी उधरभी »

सावलीत राहून मला
फळे गोड चाखायचे
राबायला फक्त 'आवडतं'!
पण शेत मला राखायचे

मोसम आला कि फक्त
उंटावरून शेळ्या हाकायच्या
दोन्ही घरचं खाऊन
नुसत्या पाट्या टाकायच्या

• रघुनाथ सोनटक्के

(२२ जुलै २०१९ दै. युवा छत्रपती, वात्रटिका क्रं. २४२)

वृक्षारोपण

खरपूस • वात्रटिका
 
 « वृक्षारोपण »
 वृक्षारोपण आजकाल
फोटोपुरते उरते आहे
प्रसिद्धीसाठीच फक्त
हा कार्यक्रम ठरते आहे

स्वच्छ कपड्यातील नेता
झाडांना हळूच टेकतो आहे
तेवढ्यापुरते चेला त्याचा
फोटोच नुसते टिपतो आहे
रघुनाथ सोनटक्के

(२० जुलै २०१९ दै. युवा छत्रपती, वात्रटिका क्रं. २४१)
२८ जुलै २०१९ च्या दै. वाचकमंच मधे प्रकाशित