मुद्दे

« मुद्दे »

मुद्द्यांना निवडणूकीआधी
वजन असतं भारी
तुडूंब वाहत असतात मग
आश्वासनांची खोरी

मुद्यांची चर्चा मग
वादात झडू लागते
राजकारण्यांच्या मुद्द्यांना
जनताही भाळू लागते

घोषणापत्रात मुद्दे घालून पक्ष
पुगळ्या कागदाच्या सोडू लागते
सत्तेत पोहचण्याचा हा 'अजेंडा' होता!
जनतेला नंतर कळू लागते

चांगले दिवस येतील यांची
नेहमीच जनतेला आशा असते
मतदानाच्या हक्कापुरती तेवढी
डोक्यात घुसली नशा असते

सत्तेपुढे शहाणपण चालत नाही
नेत्यांनाही पडतो मुद्यांचा विसर
खिसे भरून घेण्याशिवाय मग
सोडत नाहीत ते कसली कसर

कुणावर शिक्का मारावा
हाच खरा आता मुद्दा आहे
नाही म्हणुन सांगायचं तर
लोकशाही टिकवणं सुद्धा आहे

• रघुनाथ सोनटक्के